Errezeta...
 
    

1. Osagaiak

-jendea hunkitzeko lor daitekeen helburu bat hautatu, gaizki ulertua izaitea irriskatu gabe.

-Animatua den Demo mulko bat (barazkien xokoan ezik, toki guzietan aurki daitekeena).

-apainketarako, Demo jantziak eta maskak.

-diskrezio eta zuhurtzia ahur handi bat (sonoaren xokoan aurki ez daitekeena).

-argumentu egoki pinta bat (Demo-ei eskatu).

-ausardi zakutto bat (medikuntza alternatiboaren xokoan).

-garagardo batzuk ekintzaren ondotik goxatzeko (edo fruitu jusak).

2. Iraupena

Prestakuntza : zenbait egunetatik bi asteetarat, erritmoaren arabera.
Ekintza : oren bat gehienez, bi oreneko luzapenarekin beharbada.

3. Errezeta

Toki diskretu batean (besteengandik ez ikusia izateko), lor daitekeen helburua Demo mulkoarekin batera zuringoa bezala azkarki nahasi, bakotxa ongi jabetzeko errezetan ukan behar duen betekizunaz. Ahantzi gabe diskrezio eta zuhurtzia ahurra.

Ondoko platera batean, errezetari gustu guzia emanen dion saltsa prestatu : paper orrialde batean, umorea eta argudioak hedatu eta nahasi behar diren propozioak errespetatuz. Ore arina eta lixerigarria baina aberatsa lortu behar duzue.

Ekintzaren egunean, lor daitekeen helburua eta Demo mulkoa, gomitei (jendea) eta Gault et Millau-ri (prentsa) banatu beharreko saltsarekin nahasi. Zerbitzatu, eta apairuak irauten dueno ausardi zakuttoa gehitu. Ez ahantz platera ongi apaindu behar dela, jantzi xuri eta ator horiekin, baita maskekin ez bada aurrikusia mahaizapia andeatzea edo oihalak eramaitea. Pazientzia izpi bat gehitu, murru armario zola batean aurkitzen baduzue.

Urdin ilunez jantziriko kasketadun gomit batzuk hurbiltzen bazaizkizue, aldi oro aurrikusi behar dena, lasaitasun apur bat gehitu, zuen jakiak ez duelako hitz larri edo bortizkeriarik erabili behar. Lixerigaitza litzateke eta ez da Demo-en sukaldaritza berriaren filosofian sartzen.

Komisaldegian, ez sala deus ez errezetaz, sukaldaritzako sekretuek bermatzen dutelako zuen jakia ongi egina eta sorpresaz beterikoa dela, eta ez fitxik izenpetu (polizien errezetak ustelak direlako eta sabeleko mina baizik ez dutelako eragiten).

Atxiloketaren ondotik, garagardo on batzuekin goxa zaitezte.